من أكتر المشاكل إللي بتواجه الكُتاب لما بيبدأوا يكتبوا رواية
أنهم بيوصلوا لمرحلة مش عارفين يكملوا ..
مش عارفين ايه المفروض يتكتب أو (الأفكار بتخلص)
وده طبعًا بيبقى خطأ من البداية بسبب عدم التخطيط
طيب ايه هو التخطيط؟ ده إللي هنشرحه النهارده
 |
| التخطيط لكتابة رواية |
التخطيط هو البناء الحقيقي للرواية يعني مثلًا إحنا عندنا فكرة (مُكتمله) في دماغنا
وعندنا شخصيات وعارفين هنوظفها إزاي
يبقى فاضل ايه؟
ننعرف هنكتب إزاي أو بمعنى أدق ترتيب المشاهد
في اللحظة دي إنت بتتخلى عن كونك كاتب، وبتكون اشبه بـ (مُخرج)
لأنك هتبدأ ترتيب وتنظيم المشاهد
لفصول (للأحداث الرئيسية)
ومشاهد
هنجيب ورق خارجي أو أي تطبيق كتابة أون لاين ونبدأ التخطيط
فكرتي مثلًا بتتكلم عن شخص بيعاني من مرض والرواية بتحكي معاناته مع المرض ده
يبقى هعمل ايه؟
هكتب في أول الصفحة (الفصل الأول)
وتحتيها الحدث الرئيسي إللي هيحصل في الفصل ده ليَكُن مثلًا (التعريف بالبطل ومرضه)
تحتيها هنكتب المشاهد إللي في الفصل ده
1: المشهد الأول (شعور البطل بألم)
2 : المشهد التاني (البطل في المُستشفى وأهله معاه)
3 : المشهد التالت (معرفه البطل أنه عنده مرض نادر ورد فعله)
وهكذا ..
وبعدين ننتقل للفصل إللي بعده ونعمل نفس الموضوع
عنوان الصفحة (الفصل الثاني)
ونكتب المشاهد إللي هتدور في الفصل لحد ما نوصل لنهاية الرواية
إنت حققت وانجزت قد ايه من ساعة ما بدأت، ده هيخليك تعرف من الأول، إنت قادر تكتب الفكرة دي، ولا هي لسه فكرة مش مُتكمله
يخليك عارف إنك لو غيبت عن الكتابة فترة، إنت هتكمل منين، كُل الفكرة إن هيبقى عندك نسخة مصغرة من روايتك
هتبقى عبارة (عناوين رئيسية لفصولك) ووصف مشاهدك إللي هتكتبها
هديكوا مثال على رواية كامو بتاعتي أنا
الفصل الأول
(بطل الرواية في عيون الناشر والقراء)
1 : مشاعر الناشر وقلقه من عدم حضور الكاتب
2 : نظرة الناشر والقراء لبطل الرواية
3 : حوار الناشر مع صاحب المكتبة
الفصل الثاني
(حياة سارة)
1 : حياة سارة، وخوفها من والدها
2 : مذكرات سارة
3 : سارة ووالدها (أنا احب الكتابة)
وهكذا .. إللي قرأ الرواية هيفهم المكتوب
وهيفهم أن العناوين مكتوبة بطريقة تخليني أنا ككاتب عارف أنا فين والمفروض اكتب ايه
لكن هي مش شرح
الموضوع ممكن يكون مُمل شوية إنك تجمع افكارك كلها وترتبها قبل ما تكتب بالفعل
لكن هيوفر عليك كتير وقت وجُهد، ومش هيخليك تعطل في النص
طيب هو ينفع اعدل في النص؟
آه طبعًا ينفع في أي وقت تعدل، التخطيط مش إجبار عليك، هو حاجه بتتعمل لمساعدتك وبس
طيب أنا بدأت كتابة بالفعل ينفع اعمل التحطيط دلوقتي؟
آه ينفع، وهيساعدك في إللي جاي
طيب أنا لسه مجاش في دماغي باقي الشخصيات، لسه مفكرتش فيهم، اعمل التخطيط دلوقتي؟
مجاش في دماغك باقي الشخصيات يبقى لسه فكرتك مش كاملة، اديها وقتها، قبل ما تبدأ في التخطيط
إرسال تعليق