أنواع السرد في الرواية
 |
| أنواع السرد في الرواية |
الشرح
اتسألت كذه مره خلال الفترة إللي فاتت هل ممكن ابدأ من النهاية؟
هول لازم ابدأ بشكل معين؟
أو هكتب ايه في الفصل الأول
واكنت إجابتي إن هييجي وقت قدام وهشرحلكم ده
ودلوقتي فعلًا هنشرح 3 أنواع للسرد وهم:
السرد المتسلسل
السرد المتقطع
السرد المتناوب
وخلونا نبدأ بالسرد المتسلسل
السرد المتسلسل
ده تقريبًا مش محتاج شرح .. هو السرد العادي
بتبدأ فيه من المقدمة لمعرفة الشخصيات للحدث أو اللغز مرورًا بالذروة وصولًا إلى النهاية
فـ ده تقريبًا مش محتاج شرح لإنها الطريقة العادية في الكتابة
لكن خلونا ناخد مثال:
أنا دلوقتي بحكيلكم كلكم بقولكم إني:
(صحيت الصبح بدري .. فطرت .. نزلت قابلت عبدالرحمن في وسط البلد .. لعبنا ps .. كسبته كالعاده .. روحت)
سرد طبيعي لليوم
وهيكون كده بنفس الشكل في الرواية
وده هيوضح أكتر مع المثال الجاي
السرد المتقطع
هو السرد إللي بتبدأ فيه من نقطة معينه ممكن تكون نقطة الذروة أو النهاية
زي رواية مثل إيكاروس مثلًا
إللي في بدايتها هتلاقي إنك عارف أن البطل اتقتل، وبنرجع لحياته بنمشي معاه خطوة خطوة
وبنعرف ايه إللي مر بيه خلاه يتقتل
زي رواية إنستا حياة برضه الفصل الأول عبارة عن النهاية والبطل ناقصله دقايق وينتحر
وبعد كده الفصل إللي بعده المُقدمة بنبدأ من ايه اسباب البطل في إنه ينتحر اصلًا وهكذا مرورًا بباقي الأحداث
وزي رواية السنجة إللي في الفصل الأول وحتى من المقدمة الكاتب بيقولك أن الكاتب مُختفي
وبعدين بنرجع بالأحداث خالص للفترة الأخيرة في حياة البطل وبنعرف اختفى ازاي وليه
ولو هدي نفس المثال بتاع عبدالرحمن هقوله بنظام السرد المتقطع هيكون
(كسبت عبد الرحمن كالعادة في الـ Ps - بعد ما صحيت الصبح بدري - فطرت - نزلت قابلته في وسط البلد - لعبنا ps - كسبته كالعاده - روحت)
كده واضح؟
السرد التناوبي
النوع ده من السرد بيكون عبارة عن مجموعة قصص بتتحكي في نفس الوقت
وبيتربطوا ببعض بشكل أو بآخر
في مثال مشهور أوي وهو فيلم مصري اسمه (ساعة ونص) هي مجموعة من القصص بتتحكي
عشان توصيل فكرة معينه، وهي قصص مترابطه لهدف واحد
وفي روايات كتير مشهوره مكتوبة بالنوع ده زي مثلًا (هيبتا) أو (بضعة ساعات في يوما ما)
هدي نفس المثال تاني
(أحمد صحي من النوم - عبدالرحمن كان بيقرأ عن الشطرنج - صاحب محل البلاي ستيشن فتح محله)
(أحمد قعد يسمع أوتوستراد وهو لسه عـ السرير - عبدالرحمن بيسمع موسيقى فيلم Schindler's List - صاحب محل البلاي ستيشن بيفطر)
وتفضل الأحداث ماشية بالإطار ده
كل بطل من الأبطال التلاتة بنحكي جُزء من قصته وننتقل للبطل التاني ونحكي جُزء من قصته وبعدين التالت
وبعدين نرجع للأول ونفضل ماشيين بنظام ده لغاية نهاية الرواية وتخلص قصة الـ 3 أبطال بإن أحمد يروح مبسوط لأنه كسب في الـ Ps عبد الرحمن يروح زعلان لأنه خسر كالعاده وصاحب المحل يروح مبسوط لأنه كسب فلوس مننا
إرسال تعليق