من الضروي جدًا أن أنتَ ككاتب روائي تكون عارف ومجاوب على سؤال (لماذا نَكتُب)
لأن السؤال ده هيخليك توصل لهدفك اسرع
 |
***
فمثلًا الكاتب إللي بيكتب بغرض الشهرة، الخطوات إللي هياخدها عشان يوصل لشهرته دي
غير الكاتب إللي بيكتب عشان يناقش قضية معينه ويلفت نظر القراء في العالم ليها
طيب دلوقتي أنا ككاتب بكتب عشان عايز أكون مشهور اعمل ايه؟
***
مبدأيًا لازم تكون عارف ايه الخطوات أو النصائح إللي إللي بيعمل بيها كُتاب الروايات (الأكثر مبيعًا)
زي أحمد مراد أو محمد صادق في مصر مثلًا
إزاي بيكتبوا، إزاي بيختاروا غلاف رواية، إزاي بيسوقوا لنفسهم
ولازم تكون عارف أن النوع ده من الروايات له تصنيف مُعين اسمه (أدب البوب أرت)
أو بمعنى أدق الأدب الشعبي، إللي بيستخدم لغة بسيطة وبيختار الحبكات الشعبية المُثيرة للقراءة
زي الخطف وأدب الجريمة وغيرها ..
***
فـ لو إنت هدفك إنك تكون بتكتب روايات بوب أرت فمن الطبيعي جدًا إنك تكثف قراءتك في النوع ده من الروايات
وليكن مثلًا بنسبة 80% من قراءاتك
لأن من الطبيعي إنك تتأثر بكل شيء بتقراه ويأثر على أسلوبك الأدبي، ومن الممكن كمان إنك تقرأ شوية على مبادئ التسويق، لأن ده هيساعدك كتير في تحقيق هدفك من كتابة روايات توصل للبيست سيلر
ومن جانب الربح المادي، فطبعًا النوع ده من الروايات له النصيب الأكبر ..
سواء من تحقيق مبيعات كبيرة أو من خلال التحويل الرواية لأفلام أو مسلسلات مُستقبلًا
***
الروايات الفلسفية أو روايات مناقشة القضايا وغيرها من الأنواع الشبيهه
النوع ده من الروايات مش بيبع كتير في المكتبات، لأن ببساطة هو مش روايات لكل الناس
المبيعات في النوع ده من الروايات بتقتصر على (النخبة) الناس إللي متمرسه جدًا في قراءة الأدب
مش من السهل مثلًا إن قارئ متعود يقرأ روايات جريمة، يثيره أنه يشتري رواية بتتكلم العنصرية
أو معاناة مهاجر كاميروني في أمريكا
الحقيقة إن النوع ده من الأدب بينال تقدير كبير من النقاد ..
لكنه مش بيحقق نجاح جماهيري كبير ولازم الكاتب يكون عارف ده، انه هنا بيكتب روايات عشان يناقش قضية ويوصل رسالة
فنجاحه هنا بيكون بوصول الرسالة دي
مش بإنه يحقق ربح منها
مع إن تحقيق دخل من النوع ده من الروايات ممكن جدًا من خلال تقديم الرواية للمسابقات
زي:
- مسابقة البوكر العربية
- أو مسابقة الشارقة للرواية
- أو جايزة سويرس للرواية
إرسال تعليق