بعد ما خلاص عرفنا فكرتنا وعرفنا قسمناها إزاي
هنتكلم عن الجُزء المُهم جدًا
وهو جزء الشخصيات
دلوقتي إنت عندك فكرة جامدة جدًا، وقوية جدًا ..
فلازم يكون عندك شخصيات مبنيه بإحترافية عشان تقدر تعمل رواية مُتكاملة إلى حدٍ ما ..
وأكبر مُشكلة بيقع فيها الكُتاب في البداية هو إنهم بيعملوا شخصيات مثالية، وده بيكون سبب كبير في إن الرواية تاخد تقيمات سلبية من النُقادم، وتفقد كتير من جمالها
لأن مهمة الأدب هو عكس الواقع على الورق بشكل مُمتع
فـ إزاي هتعكس الواقع بشخصية غير موجوده! طبيعي جدًا أن مفيش حد فينا مثالي ابدًا، لأننا مفيناش ملايكة ولا أنبياء، فوضع شخصية مثالية في رواية او فيلم هو خطأ ساذج ..
 |
| الشخصيات وتكوينها |
***
وبشكل تاني لو بصيت للحاجات إللي إحنا بنتابعها كقراء أو متذوقي للفن بشكل عام، هنلاقي أن حتى الأبطال الخارقين إللي هم المفروض نتقبل كونهم شخصيات مثالية لكونهم (خارقين) شيء خيالي
هنلاقي أن الأبطال الأكثر شعبية ومتابعة وحُب هم الأبطال إللي عندهم نقط ضعف أكتر والأبعد عن المثالية
***
فثلًا في أفلام والكوميك بوكس بتاعة مارفيل هنلاقي ان الأكثر شعبية هناك هو ولفرين! البطل الخارق إللي عنده إكتئاب وبيحلم بكوابيس بشكل مُزمن بتخليه دايمًا بيفكر في الإنتحار!
المُفلس إللي حاول يخفي هويته ويشتغل على اوبر!
مُتخيلين؟ ده بطل خارق بس في ابعاد درامية وده إللي مخلي الشخصية أقرب للجمهور، وبعده هتلاقي إبرون مان إللي قوته في أنه غني وذكي ..
على الجانب التاني أفلام والكوميك بوكس بتاعة DC هتلاقي أن البطل الخارق الأكثر شعبية هو (بروس وين) باتمان إللي هو قوته الخارقة أنه غني، بس كده! وعنده نقاط ضعف كتير، وبيمر بمشاكل عاطفية!
***
فماينفعش ابدًا إننا نخلي شخص عادي بعيدًا عن الخيال حتى، وسيم جدًا، غني جدًا، بطل رياضي، كل البنات بتحبه وبيكره الستات وهتيجي بنت بريئة غالبة فقيرة موظفة عنده أو خدامة وتغير فكرته عن الستات ويحبها
خلاص دي كده 3 اربع روايات السوشيال ميديا! وكلهم نفس البطل، ونفس القصة
طيب ايه نقاط ضعف البطل؟
مفيش، مخابرش
***
ده طبعًا شيء ساذج، زي إنك طول الرواية تمهد للنهاية السعيدة الحتمية! إزاي إنت كاتب روائي ومن بداية القصة نكون عارفين نهايتها؟ بإن البطل والبطلة هيتجوزوا مثلًا؟
عايز أقول معلومة جانبية وهي أن لفترة كبيرة من الزمن كان غير مُعترف بالنهاية السعيدة في الأدب، وكان بيعتبروا الروايات إللي نهايتها سعيدة بالكامل ووردية إنها روايات رديئة وساذجة! متخيل؟
***
إللي عايز أقوله إنك عشان تعمل رواية تؤثر في الناس لازم البطل يكون عنده عيوب ونقاط ضعف زي المميزات
وفي على الجانب الآخر ماينفعش الشرير يكون شرير شر مُطلق بدون هدف، ما طبيعي لازم الشرير يكون له غاية من شره، مش هيروح يقتل شخص أول اليوم عشان مزاجه وحش!
***
طيب دلوقتي إحنا عايزين نعمل شيء اسمه بروفايل الشخصية
إنت دلوقتي حددت فكرتك، فعايزين نعمل شخصية رئيسية للفكرة دي
فـ الأول خلينا نقول إننا هنجيب الصفات دي إللي بيستخدمها الكاتب والمترجم حسن محمد في طريقة كتابته للروايات إللي بتحقق دايمًا الأكثر مبيعًا في امازون امريكا!
الاسم
الوصف الخارجي (الطول، العرض، اللون، الوجه، طريق المشي والتحدث …الخ)
الوصف الداخلي (هادئ، عصبي، شجاع، الخ…..)
هدف الشخصية في الرواية (ما الذي يريد تحقيقه؟)
صراعه (ما الذي يمنعه من تحقيق هدفه؟)
كيف ستتغير شخصيته لتحقيق هدفه؟.
نهاية دوره في الرواية.
كتابة فقرة قصيرة تلخص الخط الزمني له في الرواية
***
طبعًا الهدف من عمل كده إنك تحس وتحسس الناس أن الشخصية حقيقية
موجوده او طبيعية فكل ما تضيف تفاصيل أكتر كل ما هتحس إنت إن شخصيتك واقعيه وتقدر تعكس ده في الرواية
تخيل لو عملت ذكريات للشخصية وحاجات بيخاف منها ومزيكا مُفضله وأفلام
الحاجات دي هتأُثر في دماغك على طريقة كتابتك ليها وده هيفيدك جدًا في إنك تخلي كل شخصية مختلفه عن التانية في الرواية، ميبقاش كلهم نفس الشكل والطباع، وده هيأثر على الرواية طبعًا.
***
بس كده أتمنى يكون الشرح خفيف
الخميس الجاي مطلوب منكم إنكم تعملوا شخصيتكم الرئيسية للرواية بتاعتكم وتبعتوهالي برضه (يوم الخميس الصبح) لأني مش هفتح الرسايل بتاعة التاسك قبل الخميس
وأنا هكتب برضه الـ 3 شخصيات الرئيسية لروايتي وهنشرهالكم يوم الخميس عشان نمشي سوا خطوة خطوة
إرسال تعليق