مِن ما تتكون الرواية؟ (نظرة سريعة)
 |
عشان نعرف نكتب رواية خلونا الأول ناخد نبذه عن إللي بتتكون منه الأول النهارده
ومن الخميس الجاي هنبدأ نشرح كل حاجه من إللي هنذكرها بالتفصيل
خلونا الأول نقول إننا مثلًا عايزين نكتب رواية
ايه اول حاجه هتجذبنا؟ لو عندنا فكرة صح؟
يبقى أول حاجه هنحتاجها هو إننا ندور على فكرة مميزة
ومهما كانت الفكرة بتاعتنا بره الصندوق هتكون واحدة من الـ 36 حبكة لحبكات الدراما
إللي ممكن تقراها (من هنا)
***
والحبكة هي الموضوع أو الإطار اللي بتدور الرواية جواه مثلًا
من الحبكات المشهورة:
التضحية
الوقوع فريسة لسوء الحظ
قتل المقربون بالخطأ
***
طيب ايه الفرق بين الحبكة والفكرة؟
مثلًا الحبكة هي أن بطل الرواية سيء الحظ
الفكرة هي إنك تحط فكرة تخلي من الموضوع ده كوميدي أو درامي أو فلسفي مثلًا أنه بيبحث عن سبب لسوء حظه ده!
وهكذا ..
***
وبعدين بنكون شخصيات
اتكلمنا قبل كده عن تكوين الشخصيات وهنراجع عليها تاني في الفترة الجاية
وبعد تكوين الشخصيات هنيجي للجديد بقى إللي متكلمناش عنه وإللي بيخلي رواية ممتعة أو مميزة عن غيرها
وهو هي الرواية بتتكون من ايه أصلًا؟
سرد وحوار
ايه هو السرد؟
السرد هو إني أقول
ذهبت ذلك اليوم حبيبتي، لأرجوها أن لا تتخلى عني، وأن تتراجع عن فكرة الرحيل
نظرت لها بتوسل، لأرى الدموع في عينيها، تحاول أن تُداريها وقُلت:
لحد هنا ده سرد
الكلام ما بين الشخصيات هو ده الحوار مثلًا:
- برضه عايزه متكمليش؟ أنا لسه بحبك
= خلاص يا أحمد، كُل شيء إنتهى
ده الحوار ..
لما نيجي نتكلم عن السرد والحوار بشكل مُفصل، هجيبلكم تجارب كُبار الكُتاب العالميين ونصايهم، وحقيقي هتفيدكم.
***
طيب دلوقتي عرفنا الرواية بتتكون من ايه
عندنا الفكرة وعندنا الشخصيات والحبكة والفكرة
وعرفنا يعني ايه سرد وحوار
طيب هبدأ اكتب إزاي؟
مبدأيًا روايتك أي كانت بتتكون من 3 مراحل
التلت الأول : هو التمهيد والعقدة
التلت التاني : الذروة
التالت التالت : حل العقدة والنهاية
يعني ايه الكلام ده؟
يعني التلت الأول بتاع التمهيد والعقدة بنعرف فيه الشخصيات وبنعرف فيه عقدة الرواية إللي هي مثلًا
جريمة قتل بتحصل والبطل بيتم اتهامه بإرتكابها، كده بقى عندنا عقدة بتدور الرواية عشان تتحل
التلت التاني إللي هو الذروة أو نقطة الظهور هو مُنتصف الأحداث
لما البطل يعرف مين القاتل
وتبدأ مرحلة جديدة وهي مرحلة الصراع أن البطل يحاول يكشف القاتل الحقيقي عشان ينقذ نفسه
التلت الثالت بقى هو حل العقدة إللي لما البطل هنا بيحل المشكلة أو اللغز وفي المثال بتاعنا بيقدر يثبت أنه هو مش القاتل وترجع الأحداث للإيقاع الطبيعي لغاية النهاية.
ونفس الموضوع حتى لو رواية رومانسية أو خيانة أو رعب أو حتى خيال علمي
أي رواية بتمر بالمراحل دي
***
كده نكون خلصنا شرح النهارده إللي هو عبارة عن تمهيد للجاي إللي هنشرح فيه كل نقطة اتقالت هنا بالتفصل
إرسال تعليق